Пойыз терезесінен көрінген Қазақстан: Марио Хеллердің сапары
7 500 шақырым теміржол, жолаушылармен жүздесу және елді оның тұрғындарының әңгімелері арқылы тану.
Швейцариялық фотограф Марио Хеллер Қазақстанға арналған Kazakhstan Time Travel деректі фотожобасын жасады. Теміржолмен саяхаттау барысында ол елдің күнделікті тіршілігін суретке түсірді: купедегі әңгімелер, жолсеріктердің жұмысы, перрондағы қоштасулар мен жақындардың қауышуы.
Сапар туралы
Саяхат 2019 жылы Алматыдан басталды. Фотограф ірі қалаларды байланыстыратын танымал бағыттармен қатар, жолаушылар сирек таңдайтын бағыттармен де жүрді. Оны жол үстіндегі тіршілік пен сапарда кездескен адамдардың тағдыры қызықтырды.
Пойыз Қазақстанды жақынырақ тануға мүмкіндік берді. Жасы мен мамандығы әртүрлі жолаушылар естеліктерімен бөлісіп, отбасы, жұмыс және өмірге көзқарастары туралы әңгімеледі. Осы кездесулер фотосуреттер топтамасы мен жеке хикаялардың негізіне айналды.
ҚазГео өкілінің қатысуы
Сапар барысында Мариоға Қазақ Географиялық Қоғамының өкілі Дәулет серік болды. Фотограф өз материалында оның аударма жасап, жолаушылармен тіл табысуға көмектескенін атап өтеді. Бұл қолдау авторға кейіпкерлерінің әңгімелерін тереңірек түсінуге мүмкіндік берді.
Елді танытатын адамдар
Жобаның басты кейіпкерлері — жолаушылар мен теміржол қызметкерлері. Бірге шай ішу, дәм ұсыну, балалардың ойыны мен кездейсоқ таныстықтар күнделікті өмірдегі қонақжайлық пен адамға деген ықыласты көрсетеді.
Хеллердің фотосуреттерінде теміржол елді мекендерді ғана емес, ұрпақтарды, отбасылық тарихтарды және сан алуан тағдырларды байланыстырады. Әр кездесуден елдің тұтас бейнесі қалыптасады.
Жоба сандармен
- 7 500 шақырым — сапардың жалпы ұзындығы.
- Үш аптаға жуық — саяхаттың ұзақтығы.
- 225 сағат — пойызда өткізген уақыт.